Home

မြန်မာ့ရုပ်ရှင် ငွေရတုကာလ

မြန်မာနိုင်ငံ၏ ပထမဦးဆုံးရုပ်ရှင်ဇာတ်ကားမှာ  လန်ဒန်အတ် ဦးအုန်းမောင်၊ ဒါရိုက်တာ ဦးတုတ်ကြီး၊ ဓာတ်ပုံဆရာ ဦးမောင်မောင်၊ ဇာတ်ညွှန်းရေး ဆရာ  ပီမိုးနင်း တို့ရိုက်ကူးခဲ့သည့် “မေတ္တာနှင့်သူရာ (love & Liquor)” ရုပ်ရှင်ဇာတ်ကားကြီးဖြစ်သည်။ ထိုရုပ်ရှင် ဇာတ်ကား ကြီးကို ယခု ဗိုလ်ချုပ်အောင်ဆန်းစျေးနေရာတွင် ရှိခဲ့သော “စီနီမာဒီပဲရစ်”အမည်ရှိ  ရုပ်ရှင်ရုံတွင် ၁၉၂၀ ပြည့်နှစ် နိုဝင်ဘာလ ၆ ရက်နေ့တွင်ပြသခဲ့သည်။ ရုံပြည့်ရုံလျှံ အားပေး ကြည့်ရှုခဲ့ပြီး ကြိုးစားလုပ်ဆောင်ရကျိုးနပ်သွားသဖြင့် ဒုတိယမြောက်ရုပ်ရှင်တစ်ကားရိုက်ကူးရန် ကြိုးစားခဲ့ကြသည်။ဆရာကြီးပီမိုးနင်း၏ မူလဝတ္ထုအမည် “မနုကျေးတောသူ” ကို “ကျေးတောသူမနု” ဟု နာမည်ပြောင်းကာဒုတိယရုပ်ရှင်ဇာတ်ကားကို ဇာတ်လိုက်မင်းသားအဖြစ် ဦးညီပု၊ မင်းသမီးအဖြစ် ဒေါ်ငွေမြိုင်၊ လူကြမ်းတုတ်ကြီးအဖြစ် ဦးပု၊ မနု၏ဖခင်အဖြစ် ဦးပါကြီး တို့ပါဝင်သရုပ်ဆောင်ခဲ့ကြသည်။ကျေးတောသူမနုဇာတ်ကားကို (၃)လနှင့်အပြီး ရိုက်ကူးနိုင်ခဲ့ပြီး ၁၉၂၁ ခုနှစ် မတ်လတွင် ရုံတင်ပြသရာ ရုံပြည့်ရုံလျှံအားပေးကြည့်ရှုကြသည်။

တတိယဇာတ်ကားမှာ “ရွှေပေးလို့ မရ “ဖြစ်သည်။ ထိုဇာတ်ကားတွင် ဦးဆင်၊ ဒေါ်ဌေး၏သား ဦးမောင်မောင်က ဇာတ်လိုက်မင်းသားအဖြစ် ပါဝင်သရုပ်ဆောင်ထားသည်။စတုတ္ထ ဇာတ်ကားမှာ “တိမ်တလုံး ” ဖြစ်၍ ပဉ္စမဇာတ်ကားမှာ “စိတ်အာရုံ ” ဖြစ်သည်။ ဆဋ္ဌမဇာတ်ကားမှာ “ခင်ခင့်မှားတော်ပုံ “ဖြစ်သည်။ထိုဇာတ်ကားတွင် ဦးအုန်းမောင်သည် သူ၏ရုပ်ရှင်ပညာစွမ်းကို ပြသခဲ့လေသည်။ ကင်မရာတွင် ကရိယာ မစုံလင်ဖြင့် လူတစ်ကိုယ်ကို နှစ်ကိုယ်ခွဲသော ဇာတ်ကားဖြစ်သည်။ ထိုဇာတ်ကားတွင် မင်းသားအဖြစ် ဒဂုဏ်ဦးဘတင်သည် မောင်မောင်တင်နှင့်မောင်မောင်လွင် အမွှာပူးညီအစ်ကိုအဖြစ် သရုပ်ဆောင်ခဲ့သည်။ သတ္တမ ဇာတ်ကားမှာ “တစ်သက်လုံး ဖုံးသမျှ ကုန်းတော့မှာပေါ်”  ဖြစ်သည်။ ထိုဇာတ်ကားမှစ၍ ရုပ်ရှင်မင်းသား မောင်ဘတင့်နှင့် မင်းသမီး ခင်ခင်နုတို့ တွဲဖက်သရုပ်ဆောင်ခဲ့သည်။

၁၉၂၃ခုနှစ် တွင် “တောမြိုင်စွန်းက လွမ်းအောင်ဖန်” အမည်ဖြင့် ရုပ်ရှင်ဇာတ်ကား တစ်ကားကို ထုတ်လုပ်ခဲ့သည်။ ထိုဇာတ်ကားတွင် ဦးဘကလေးက မင်းသားမောင်ဘဌေး(ဦးညီပု)၏ လူယုံတော်အဖိုးကြီး ဦးရွှေရိုးအဖြစ် ပါဝင်သရုပ်ဆောင်ခဲ့သည်။ ဇာတ်ရံအဖြစ်သရုပ်ဆောင်ခဲ့သော်လည်း သရုပ်ဆောင်ကောင်းလှသဖြင့် နာမည်ကျော်ကြားလာပြီး “အဘရေ” ၊ “တောသားလေးရွှေရိုး” ၊ “ရွှေမင်းဝင်” ၊“တစ်ခိုင်လုံးရွှေ” ၊“တစ်ခိုင်လုံးစိန်” ၊ “ပလုပ်တုပ်တုပ်”၊ “မှိုင်းဝေဝေ”၊ “ရွှေတလေး” ၊ “ရွှေရိုးဘယ်မလဲ” ၊ “ကြင်စဦး” ၊ “ဝေလွင်လွင်”၊ “ကိုလူပျို” ၊“သုံးပွင့်ဆိုင်”၊ “ခင်မောင်ကြီး” ၊ “ရွှေပေလွှာ” အစရှိသည့် ဇာတ်ကားများစွာတွင် ပါဝင်သရုပ်ဆောင်ခဲ့သည်။

ထို့နောက် ဇာတ်ကားများဆက်လက်ရိုက်ကူးခဲ့ကြပြီး လူကြိုက်များသော ဇာတ်ကားများမှာ “ဣဋ္ဌာရုံ” ၊ “ဣတ္ထိယ”၊ “အပျိုစင်”  ၊ “ပန်းစေတီ”  ၊ “အချစ်ဆုံး“၊ “သူဇာ” ၊  “ဗိုလ်အောင်ဒင်” ၊  “ချစ်စနိုး” ၊ “မြှားနတ်မောင်“၊ “ချစ်အမျှ” ၊ “ချစ်ရေစင်” စသည်တို့ ဖြစ်သည်။